32nd Sunday in Ordinary Time

Mari Yohan Bar Thoma
Nov 7, 2021
2 min read

Ika tatlongput-dalawang Linggo ng Karaniwang Panahon

November 7, 2021

Marcos 12, 38-44

Sa Ngalan ng Ama, at Ng Anak, at ng Espiritu Santo. Amen

Buksan mo ang aming mga labi

at pupurihin ka ng aking bibig

Luwalhati sa Ama, at sa Anak, at sa Espiritu Santo

Kapara noong una, ngayon, magpakailanman at magpasawalang hanggang. Amen

Ang Mabuting Balita ng Panginoon ayon kay San Marcos

Noong panahong iyon, sinabi ni Hesus sa kanyang pagtuturo. “Mag-ingat kayo sa mga eskriba na mahilig maglalakad nang may mahabang kasuutan at natutuwang pagpugayan sa mga liwasan. Ang ibig nila’y ang mga tanging luklukan sa mga sinagoga, at ang mga upuang pandangal sa mga piging. Inuubos nila ang kabuhayan ng mga babaing balo, at ang sinasangkala’y ang pagdarasal nang mahaba! Lalo pang bibigat ang parusa sa kanila!”

Umupo si Hesus sa tapat ng hulugan ng mga kaloob doon sa templo, at pinagmasdan ang mga taong naghuhulog ng salapi. Maraming mayayamang naghulog ng malalaking halaga. Lumapit naman ang isang babaing balo at naghulog ng dalawang kusing na katumbas ng isang pera. Tinawag ni Hesus ang kanyang mga alagad at kanyang sinabi, “Sinasabi ko sa inyo: ang dukhang balong iyon ay naghulog ng higit sa kanilang lahat. Sapagkat ang iba’y nagkaloob ng bahagi lamang ng hindi na nila kailangan, ngunit ibinigay ng balong ito na dukhang-dukha ang buo niyang ikabubuhay.”

Ang Mabuting Balita ng Panginoon

Espiritual na Pakikinabang

O Hesus ko, naniniwala ako na ikaw

ay tunay na naririyan sa Banal na Sakramento.

Minamahal Kita ng higit sa lahat

at ninanais ko na Ikaw ay tanggapin sa aking kaluluwa.

Bagama’t sa sandaling ito ay hindi Kita matatanggap

sa paraang sakramental,

pumarito ka man lamang sa aking puso

sa paraang espiritwal.

Tinatanggap Kita na Ikaw na naririto

at buong puso akong nakikipag-isa sa Iyo.